يوم زفر

في أدناة يوم اتصل على صاحبي ( أحمد شعيب ) و قالي عندي لك مشروع تصوير بخااطرك !!

بس هاا تراه زفر رديت عليه : افا عليك بس يا حبي للزفر قوول شعندك فمختصر الحجي الله يسلمكم

في شخص ناوي يفتح محل بيع أسماك و يبي صور للسمج و الربيان حق السيارة و الاعلانات و انت رايح المهم قلت مادام السالفة فيها سمج ما يحلى التصوير الا بالثلج و بعد اعلان حالة النفير بالمطبخ قاموا الصبيان و صفوا الثلج و انا قاعد اضبط الفلاشات
( تخيلوا الاستيديو رااح المطبخ !! ) و استعدينا تماما بس ناقص السمج ...

يوم وصل السمج فريش من السوق حطييتهم و بلشت تصوير اول صنف كاان الهامور و يا زييينه و اهو كان اسهل شي بالتصوير لانك اذا بطلت حلجه يتم مبطل و ...الخ من الوضعيات

و بعدها صفييينا الربيان و طحناله تصوير بس تدرووون شنو اكبر مشكلة انه كل شوي لازم انا اصف السمج بطريقتي و اروح اغسل و انطر ايدي تنشف عدل عشان امسك الكاميرا بس الحمدلله طلعت النتايج تسوى :)


ثم اصعب سمجه بالتعامل و هي الزبيدي تدرون ليش لانه قشور السمجة ( السفط ) بسرعه يطيح و اذا طاح يصير شكلها مو فريش بس الحمدلله شوفوا الصورة

و اخيرا خذييت جم لقطة جمااعية و للبواليل و الزبيدي و الربيان و مثل ما تشوفون


و بعد أيام من التصميم المبدع طلعت النتيجة مثل ما اهو واضح بالتصميم الي تحت


و مشكورين على المتابعه و يا ريت اشوف رايكم بالتعليقات

A Day to Remember :)

( A day to remember - يوم يذكر )

أول شي انا اسف انقطعت فترة ( ادري ما امداني بلشت ) لكن انتظرت اليوم الي اخلص في اختباراتي و ابدي اكتب عن قصة جمييلة مرت علي و معاها جم صورة . في يوم من الأيام في ماليزيا و بالتحديد بتاريخ 27-8-2008 في جزيرة من أجمل الجزر بماليزيا كنا هناك نقضي آخر أيام سفرتنا مع مركز الرواد و كانت هذي الأيام الخيرة عبارة عن جدول مفتوح ما فييه اي التزاام بأي مواعيد فطلعنا و تمشينا عالبحر ( أنا و حمود الخضر و طلال المطر و جراح العثمان )
كنت قاري نصيحة حق مصور محترف حييييييييييييل اسمه Joe McNally يقول فيها اخذ كاميرتك معاك بأي مكان بأي ظرف ما تدري شيصير ( طبعا هذا ترجمة كويتية بحته ) فذاك اليوم قلت خناخذ الكاميرا يمكن أطلع لي بجم صوورة و بدينا هالطلعة بالصورة الي فووق و تعلمت و بعدها طلبت من الشباب يسوون حركات و انا أصورهم خوو احنا طالعين نتونس فأول حركة كاانت ( تعالوا لي ركض ) بدون أي تفكير مسبق بعفوية مطلقة و كانت النتيجة
صوورة يووم شفتها تذكر صور جيوردانو و دعاياتهم شفت الحركات ( العبط ) شكلها أونس خنجرب و بنقزه خطييرة من حموود هذا الي طلع معااي
اكتشف سر عجيب ( العفوية دااائما أجمل ) بدون تصنع و بدون أي تكلف يطلع الشخص على حقيقته و ينعكس جمال روحه بجمال الصورة .... و بعد التطفش بالماي و اللعب بالرمل صدت لقطة حق طلاال و اهو قاعد يركض عاليال ( الشاطئ) و طلعت الصورة
سوااالف ( لا تيأس فغدا يوم جديد ) و بعد مدة طويييلة قضيناها بالتصوير عدت ال3 ساعات و صور عددها أكثر من 100 صورة قلنا نريح عاليااال و نقعد عالرمل و الحمدلله تسجل اليوم في مخي و صاار ( يوم يذكر A day to remember )




و انا قاعد اريح مالي خلق اصور بعيد قلت أصور جمااال رجلي D:

Thank you for visiting
شكرا عالزيارة لا تنسون التعليقات

ليلة من أجل غزة

الكل يذكر أيام الاعتداءات على غزة و البلاوي الي كنا نشوفها يوميا مو هينة و حصلت مو بس على تعاطفنا احنا المسلمين بالعكس حتى تعاطف كل من يفكر بشي اسمه انسانية و عشان ما اروح بعيد في منتصف هذي الأيام ( الكئيبة) طلبت منا دكتورتنا د.كوينسان تشاو و هي رئيسة قسم العمارة في الكويت أصولها صينية ولا اهي مسلمة و لا حتى قريبة من الاسلام و لكن هذي القضية أثارة اهتمامها و قالت نبي منكم مشروع بآخر الكورس كل واحد يشد حيله و يسوي شي يعبر فيه عن المأساة الي قاعد تمر فيها غزة و و و سمت المشروع هذا

( ليلة من أجل غزة A night for GAZA)

عموما كل وااحد يبي يبدع أكثر من الثاني فبدت الأفكار و جلسات عصف الأفكار و طلعنا (مجموعتنا) بفكرة عبارة عن انا نبني طوفة تعبر عن طوف بيوت غزة الي قاعد تتهدم و حطينا داير مدايرها اسلاك شائكة و دم ملطخ كل مكان و برميل شابين فيه شموع وااايد عشان يبين شكله من بعيد نفس البراميل الي يتدفون فيها

و بعد ما خلصنا كل شي طرت على بالي فكرة لييش ما أييب أخوي الصغير و ألي يمثل انه واحد من الأطفال الي ماتوا بغزة بعد قصف المدارس !! و بعد اقنااااع طويل و مكافآآآآت كثير وافق و هذي جم صورة للمشروع و ضروري اسمع ( أقرا ) تعليقاتكم :)

و هذا الشكل الي تحت الناس يشوفونه أول ما يدشوون المعرض

و هذا انا و اخووي :)
شكرا

من أجمل اللقطات :)

يا هلا و غلا فيكم كلكم و مدونتي او معرضي الصغير مشكورين على زيارتكم و راح أبدي اليوم بصورة بالنسبة لي من أجمل الصور الي التقطتها و كانت في ماليزيا سنة 2007 و في كل يوم أمسك الكاميرا و أحاول أصور أتعلم شي جديد و مستحيل يمر يوم ما أكون تعلمت فيه شي في ذاك اليوم و بالتحديد في تاريخ 22-8-2007 كنا في رحلة بين جزر في غاية الروعة و كنت توني متعافي من كسر برجلي مرينا على محطة يقوم فيها سايق الطراد باطعام النسور و محاولة صيد النسر بلقطة حلوة و اهو نازل على الأكل كلش مو سهل حاااولت واايد و صورت أكثر من 30 صورة و الحمدلله ضبطت معاااي هاذي اللقطة و بعد بعض اللمسات صارت الي نشووفها جدامنا ضرووري اسمع(أقرأ) منكم تعليقات و شكرا :)